Senior Reporter
अर्थ / वाणिज्यपछिल्लो समय विभिन्न बैंकका ग्राहकहरूलाई लक्षित गरी २४ घण्टाभित्र मोबाइल बैंकिङ सेवा बन्द हुने त्रास फैलाउँदै 'फिशिङ' लिंकहरू पठाउने क्रम बढेको पाइएको छ। यसैबिच विभिन्न बैंकले सूचना जारी गर्दै आफ्ना ग्राहकहरूलाई उच्च सतर्कता अपनाउन आग्रह गरेको छ। स्क्यामरहरूले पठाउने यस्ता भ्रामक एसएमएसमा बैंकको हुबहु आधिकारिक पेज जस्तै देखिने नक्कली लिंक जोडिएको हुन्छ जहाँ ग्राहकले आफ्नो मोबाइल नम्बर, पासवर्ड र पिन राख्ने बित्तिकै बैंक खातामा रहेको रकम क्षणभरमै गायब हुने जोखिम देखिएको छ। विशेषगरी 'भर्सेल' (Vercel) जस्ता प्लेटफर्मबाट तयार पारिएका नक्कली वेबसाइटहरूले ग्राहकको नागरिकताको फोटो र परिवारको विवरण समेत संकलन गरिरहेको पाइएको छ। नबिल बैंकले ओटीपी (OTP), पिन, पासवर्डजस्ता संवेदनशील जानकारी बैंकका कर्मचारी वा अन्य कसैलाई पनि नदिन अनुरोध गरेको छ। यदि कतैबाट केवाईसी अपडेट भएन वा खाता निष्क्रिय हुन्छ भन्दै शंकास्पद कल वा मेसेज आएमा तत्काल बैंकको आधिकारिक वेबसाइट वा नजिकैको शाखा कार्यालयमा पुगेर मात्र पुष्टि गर्न सुझाव दिइएको छ।
तेह्रथुम | तेह्रथुमको पर्यटकीय बजार वसन्तपुरमा पछिल्लो समय दैनिकजसो लाखे नाचको रौनक देखिन थालेको छ। नेपालका विभिन्न समुदायमा प्रचलित मौलिक सांस्कृतिक परम्पराको महत्वपूर्ण हिस्सा मानिने लाखे नाचका टोलीहरू विभिन्न स्थानबाट वसन्तपुर पुगेर प्रदर्शन गरिरहेका छन्। संखुवासभा, धनकुटालगायत विभिन्न ठाउँबाट आएका लाखे नाचका टोलीले बजार क्षेत्रमा नाच प्रस्तुत गरिरहेका छन्। पछिल्ला दिनमा वसन्तपुरमा दैनिकजसो २ देखि ५ समूहसम्मका लाखे टोलीले प्रदर्शन गर्ने गरेका छन्। लाखेको आकर्षक मुकुन्डो, परम्परागत पोसाक, बाजागाजा र नाच हेर्न बजारमा स्थानीय तथा बाह्य आगन्तुकको समेत भीड लाग्ने गरेको छ। लाखे नाच विशेषगरी नेवार समुदायको महत्वपूर्ण सांस्कृतिक परम्परा भए पनि पछिल्लो समय यो संस्कृति विभिन्न ठाउँमा फैलिँदै गएको छ। विशेषगरी गाईजात्रा, कृष्ण जन्माष्टमी तथा अन्य जात्रा र सांस्कृतिक अवसरमा लाखे नाच प्रदर्शन गर्ने परम्परा छ। लाखेको भेषमा नाच्ने कलाकारले बाजागाजाको तालमा प्रस्तुत गर्ने नृत्यले दर्शकलाई आकर्षित गर्ने गर्दछ। परम्परागत मान्यताअनुसार लाखेलाई समुदाय र बस्तीको रक्षासँग जोडेर पनि हेर्ने गरिन्छ। समयसँगै लाखे नाच मनोरञ्जनसँगै मौलिक कला, संस्कृति र पहिचान संरक्षण गर्ने माध्यमका रूपमा समेत स्थापित हुँदै गएको छ। वसन्तपुरमा विभिन्न जिल्लाबाट लाखे टोली आउन थालेपछि बजारको सांस्कृतिक माहोल थप जीवन्त बनेको छ। दैनिकजसो हुने प्रदर्शनले स्थानीयलाई आफ्नै संस्कृति नजिकबाट अनुभव गर्ने अवसर दिएको छ भने बाह्य आगन्तुकका लागि समेत नयाँ आकर्षण थपिएको छ। वसन्तपुरमा देखिन थालेको यो लाखे नाच केवल मनोरञ्जनको कार्यक्रम मात्र नभई विभिन्न ठाउँमा जीवित रहेको मौलिक संस्कृति, परम्परा र सामाजिक सम्बन्धलाई एउटै ठाउँमा जोड्ने माध्यमसमेत बनेको छ।
हाम्रो पोर्टलमा विज्ञापन गर्नुहोस्
लाखौं पाठकमाझ तपाईंको व्यवसाय तथा ब्राण्ड प्रवर्द्धन गर्नुहोस्।
सम्पर्क गर्नुहोस्